Fernán Gómez das Seixas (III), citado como escudeiro en 1423, foi fillo de Fernán Gómez das Seixas (II), vasalo do rei e quen lle mercou ao seu irmán Vasco Gómez das Seixas (I) a súa parte no couto de Xiá en 1381, e de Leonor Rodríguez de Rodeiro. Estivo casado con Leonor González de Parga, filla de Munio Fernández e neta de Roi López de Aguiar, e os seus fillos foron Vasco Gómez das Seixas (III), quen recibiría e transmitiría San Paio de Narla, Luis das Seixas (I), quen testou en 1462, deixando por herdeiro o seu irmán anteriormente citado, Fernán Gómez das Seixas (IV), en cuxo testamento de 1513 dispuxo o seu enterramento en San Martiño das Seixas, Pedro das Seixas e, talvez, Teresa das Seixas, casada con Pedro Ares de Prado.

​

A través da documentación da época sabemos que este escudeiro señoreou San Paio de Narla e que recadaba as cinco oitavas partes das rendas correspondentes á igrexa de Santa María de Xiá. En 1423 reclamoulle ao abade de San Vitorio de Ribeira de Miño o padroado e xantar que lle correspondían por herdanza da súa “nana” Leonor Rodríguez de Rodeiro. En 1425, e correspondendo ás súas pretensións, os fregueses de varias parroquias reafirmaron a súa intención de pagar as rendas e dereitos aos seus párrocos locais e non ao bispo de Lugo.